Film :Little Miss Sunshine
Direction : Jonathan Dayton, Valerie Faris
Starring: Greg Kinnear, Toni Collette, Abigail Breslin, Steve Carell, Paul Dano, Alan Arkin
Year : 2006
Language : English
Genre : Comedy - Drama

தொடர்ந்தோ அல்லது அவ்வப்போதோ வெற்றிகளைக் கடந்து செல்லுவது மட்டுமே வாழ்க்கையன்று. தோல்வியையும் தாங்கி அணைத்துச் செல்வதே வாழ்க்கை.. தோல்வி என்பது போட்டியில் பங்கேற்காததேயொழிய போட்டியிட்டு வருவதல்ல என்பதை அழகாகவும் நகைச்சுவையாகவும் ஒரு திரைப்படத்தில் சொல்லமுடியுமா? மனம் சார்ந்த குடும்பப் பிரச்சனைகளை இவ்வளவு அழகாக சொல்லமுடியும் என்கிறார் இப்படத்தின் இயக்குனர் ஜோனதன் டேய்டன் மற்றும் அவரது மனைவி வெலரி ஃபாரிஸ். இது இவர்களது முதல் படமும்கூட.

Little Miss Sunshine எனும் சிறுமியர் அழகிப் போட்டிக்குத் தகுதி பெறும் ஆலிவின் குடும்பம் நெருக்கடியான சூழ்நிலைகளால் பிண்ணப்பட்டது. உணர்வுகளால் ஒவ்வொருவரும் தோல்வியின் விளிம்பில் இருப்பவர்கள். சிலர் விரக்தியின் காரணமாக மெளனித்தோ அல்லது பேசிக் கொண்ட்டோ இருப்பவர்கள். ஆலிவின் மற்றும் அவளின் தாய் ஷெரில் ஆகிய இருவருமே அவர்களது குடும்பத்தில் மிகமுக்கிய பாலமாக இருப்பவர்கள். ஆலிவ் சிறுமியாக இருப்பதால் அவளது ஆசைகளுக்கு இணங்க வேண்டி வேண்டா வெறுப்புடனும் ஷெரில் ஒரு தாயாக இருப்பதால் ஆலிவின் ஆசையை நிறைவேற்றும் பொருட்டு வேண்டும் விருப்புடன் அனைவரையும் கட்டி மேய்ப்பதும் படத்தில் மிக முக்கிய விஷயங்கள்.

ஆலிவுக்கு அழகிப் போட்டியில் பங்கேற்கும் வாய்ப்பு கிடைக்கிறது. அழகிப் போட்டி கலிபோர்னியாவில் நடைபெற இருப்பதால் அவளை பெற்றோர்களே அழைத்துச் செல்லவேண்டும். ஆலிவின் தந்தை ரிச்சர்ட் மனித வள மேலாண்மைப் பேச்சாளர். தோல்வியைப் பற்றி பாடமெடுக்கும் இவர் பலமுறை முயன்று ஒரு சிறப்பான இடம் கிடைக்காமல் துவண்டுகிடப்பவர். ஆலிவின் அழகிப் போட்டிக்குத் தயார்செய்யும் பொறுப்பு அவளது தாத்தாவாகிய எட்வினுக்கு உண்டு. எட்வின் ஒரு போதைமருந்து அடிமையும் கூட. ஆலிவின் அண்ணன் ட்வெயின் விமானியாக விரும்பும் கனவுடன் யாரிடமும் பேசாமல் மெளனத்தைக் கடைபிடிப்பவன்... குடும்ப வெறுப்பும் உண்டு. ஆலிவின் மாமா ஃப்ராங்க் காதல் தோல்வியால் தற்கொலைக்கு முயன்று மீண்டவர். ஓரினச்சேர்க்கையாளர். ஃப்ராங்க் பற்றி ஆலிவ் கேட்கும் விபரங்கள் குறிப்பிடத்தகுந்த பகுதி. ஆலிவ் சிறுமியாக இருந்தாலும் அவளுக்கு எல்லா விஷயங்களும் சொல்லப்படவேண்டும் என்பது அனுபவப்பயிற்சிக்காக என்பது நம்மிடையே பல விஷயங்களை மறைக்கும் பெற்றோர்களை நினைக்கையில் வெட்கமாகவே இருக்கிறது.



இப்படிப்பட்ட நெருக்கடியான சூழ்நிலையில் ஆலிவ் ஜெயித்தே ஆகவேண்டும் எனும் மறைமுக கட்டாயத்தின் பேரில் எல்லாருமாக கலிபோர்னியா கிளம்புகிறார்கள். இவர்களது பயணப்பிரச்சனை வாடகைக்கு எடுத்த காரின் ஸ்டார்டிங் ட்ரபிலிலிருந்து தொடங்குகிறது. இவர்கள் ஒவ்வொருவரையும் மெல்ல மெல்ல நகைச்சுவையாக விவரிப்பதே திரைக்கதையின் மிகச்சிறப்பான அம்சம். எட்வினும் ஃப்ராங்கும் சண்டையிடுவதை ஆலிவ் கேட்டுவிடப்போகிறாள் என்று பதைக்கும் தந்தையை நினைக்கையில் ஒரு சில நினைவுகள் எழுகின்றன. நம் கண்ணருகே நமது பெற்றோர்கள் சண்டையிடுவது எத்தகைய பாதிப்புக்கு உண்டாக்குகிறது? எட்வின் ரிட்டயர்ட் ஆனவர் என்பதாலும் அவரது பிண்ணனி காரணமாகவும் விரக்தியடைந்து “ நிறைய பெண்களை அனுபவி” என்று அறிவுரை வழங்குவதிலிருந்து அவரது வாழ்க்கை எத்தனை வறட்சியான சூழ்நிலையில் இருந்தது என்று மேலோட்டமாக புரிந்து கொள்ளமுடிகிறது. நிறக்குருடு காரணமாக ட்வெயின் விமானியாக முடியாது எனத் தெரிந்தது முதல் அவர் மெளனமாக இருப்பதைக் கைவிடுகிறார். எட்வின் அன்றைய இரவு எதிர்பாராத விதமாக இறந்து போய்விடுகிறார். பிரச்சனைகள் என்பது இக்கட்டான சூழ்நிலைகளைப் பொறுத்துப் பார்த்து வருவதில்லை. திரைப்படம் முழுக்க பிரச்சனைகளைக் கையாள்வதையே சொல்லிக் கொண்டிருக்கிறார் இயக்குனர்

இவ்வகையான படங்களை ரோட் மூவி என்பார்கள். பயணத்தின் போது நிகழ்பவைகள். தோல்வி என்பது போட்டியில் கலந்து தோற்பதல்ல, போட்டியிலேயே கலந்து கொள்ளாமலிருப்பது. எட்வின் இறந்து போனாலும் போட்டியில் கலப்பதை நிறுத்திக் கொள்ளக்கூடாது என்பதற்காக பிணத்தோடேயே கலிபோர்னியா செல்கிறார்கள். எட்வின் இறந்த பிறகு அப்பிணத்தை கள்ளத்தனமாக மருத்துவமனையிலிருந்து எடுத்து வருவது நகைச்சுவையாகப் பிண்ணப்பட்டிருந்தாலும் அதற்குப் பின் மறைந்திருக்கும் வெற்றி பெறுதலுக்கான விருப்பமே முன்னுக்குத் தெரிகிறது. ஆலிவ் அந்த போட்டியில் கலந்து வெற்றிபெற்றாளா? அவளுக்கு என்ன நேர்ந்தது என்பதே படத்தின் இறுதிமுடிவு.

எட்வினாக நடித்திருக்கும் Alan Arkin இப்படத்திற்காக சிறந்த துணை நடிகர் அகடமி விருதைப் பெற்றார். திரைப்படத்தில் அவரது பாகம் சிறப்பானது. ஆலிவாக நடித்திருக்கும் சிறுமி அபிகெயிலின் நடிப்பு ஒரு அசாதாரண பாத்திரத்தை சாதாரணமாகக் கையாளும் சிறுமியைப் போன்றிருந்தது. தான் ஒரு அழகியில்லை என்று உணர்ந்து தனது தொந்தியை நீவிக்கொண்டிருக்கும் காட்சியொன்றே போதும் அச்சிறுமியின் மிக அழகான நடிப்புக்குச் சான்று. சிறந்த திரைக்கதைக்கான அகடமி விருது பெற்ற இத்திரைப்படம் நகைச்சுவையும் வாழ்வில் வந்து செல்லும் தோல்விகளை எப்படி எதிர்கொள்ளவேண்டும் என்பதையும் கூறுகிறது. சிக்கலான குடும்பத்திலிருந்து ஒவ்வொருவராக மீளும் காட்சிகள் இயல்பாகவும் நாடகத்தனமற்ற திணிப்புகளற்றதாகவும் இருக்கின்றன. கதாநாயகக்குடும்பம் என்பதால் திறமைகள் மலிந்து கிடக்கும் என்று எண்ண வேண்டாம். ஒவ்வொருவருக்குள்ளும் அவர்களுக்கென்றே திறமைகள் இருக்கின்றன ; சிலருக்கு குறைந்தோ சிலருக்கு அதிகமாகவோ, ஆலிவ், அழகிப் போட்டிக்கான திறமைகளற்றவள் என்றாலும் கலந்து கொண்டது அவளின் வெற்றி. அவள் பெறும் தோல்வியை சந்தோஷமாக ஏற்றுக் கொள்வது அவளின் குடும்பத்தின் வெற்றி.

வெற்றி மட்டுமே வெற்றியல்ல ; தோல்வியை மகிழ்ச்சியாக ஏற்றுக் கொள்ளுவதும் வெற்றியே....

பதிவு பிடித்திருந்தால் இண்ட்லியில் வாக்களியுங்கள்



சலனமேயற்ற மனதெங்கும் மெல்ல ஊடுறுவி வடுவாக்கிச் சிரிக்கும் திறமை மெல்லிய இசைக்கு உண்டு. நம்மையும் அறியாமல் நம் ஆழ்மனம் அழுவதன் வெளிப்பாடு கண்களில் தெரிந்துவிடும்.. விண்ணைத்தாண்டி வருவாயா படத்தில் மன்னிப்பாயா பாடலைக் கேட்டு ஒரு நிமிடம் என் கண்களில் நீர்த்திவளை கட்டி நிற்பதை அறிந்து இசை ஒரு மனம் குலைக்கும் போதை என்று மீண்டும் தெரிந்து கொண்டேன். மெல்லிய இசை எப்படி மனதை மயக்கும் கவர்ச்சிக்கன்னிகளாகிறது என்று மட்டும் புரியவேயில்லை.


மீண்டும் டானி பாய்ல், ஏ.ஆர்.ரஹ்மான் இணைந்த 127 ஹவர்ஸின் சவுண்ட்ராக்கை சமீபமாகக் கேட்டுக் கொண்டிருக்கிறேன். மனதை இசையெனும் வஸ்துவால் மயக்கும் இந்த ட்ராக்குகள் ரஹ்மானின் மாஸ்டர்பீஸ்களில் ஒன்று. ஆஸ்கர், கோல்டன் க்ளோப் மற்றும் கிராமி விருது பெற்ற ஏ.ஆர்.ரஹ்மானின் இரண்டாவது விருது பயணம்.. எப்படியாவது இந்த படத்தைப் பார்த்துவிடவேண்டும் என்று நினைத்திருந்தேன். ஆனால் லிமிடட் ரிலீஸ் என்று சொல்லி என் தலையில் மண்ணை வாரிப் போட்டுவிட்டார்கள், சரி கள்ளத்தனமாகவாவது பார்த்துவிடலாம் என்று நினைத்தால் அதற்கும் வழியில்லாமல் போயிற்று.

Liberation Triplet :

இந்த ஆல்பத்தை நன்கு கேட்கும்பொழுது அதிலிருந்து மூன்று பாடல்கள் ஒன்றுகொண்டு தொடர்பு கொண்டிருப்பதாகத் தெரிகிறது. முதலாவதாக Liberation Begins. பாடலில் அக்வஸ்டிக் கிதார் இசை (Acoustic Music) மட்டுமே வழிந்தோடுகிறது. அதன் கம்பி மீட்டல் காதுகளில் அமர்ந்து இசையை கொஞ்சம் கொஞ்சமாய் ஊற்றிக் கொண்டிருக்கிறது. இரண்டு நிமிடங்கள் மீட்டப்படும் இவ்விசையை இரவுகளில் கேளாதீர், தலையணை, சொட்டுச் சொட்டாய் நனைந்திருக்க நான் பொறுப்பில்லை. ஆனால் இது கொஞ்சம் சிமிலியர் டூ ஆரோமலே.. நன்கு ஆழ்ந்து கேட்டால் ஆரோமலேயின் தாக்கம் தெரியும். ஒருவேளை இரண்டுமே கிதார் என்பதால் இருக்கலாம். இந்த இசையின் தொடர்ச்சி Liberation In A Dream.. சற்றே வேகமாக கிதார் மீட்டுகிறது. லிபரேஷன் என்றால் விடுதலை... வேகமாகச் செல்லும் இந்த இசையைக் கேட்கும் பொழுது அகப்பட்டு விடுவித்துக் கொள்ளுதலை நினைவுபடுத்துகிறது. நிறைவு பெறும் பொழுது கிதாரைத் தொடர்ந்து வரும் வயலின் ஸ்ட்ரிங் மற்றும் பேஸ், போராட்டத்தில் வெற்றி பெறுதலைக் குறிப்பதாக எனக்குப் படுகிறது. இந்த ட்ராக்கையும் தொடர்ந்து மூன்றாவதாக Liberation... இவ்விரு பாடல்களிலும் கிதாருடன் வேறு பல இசைக்கருவிகளும் இசைகின்றன. என்றாலும் மூன்று பாடலிலும் ஒரேவகையிலான கிதார் இசை வேகத்தைப் பொறுத்து மாறி மாறி நமக்குக் கிடைக்கிறது. புதுப்பேட்டை படத்தின் தீம் ம்யூஸிக் ஒரு சிறந்த மெலடி அக்வஸ்டிக் கிதாருக்கு உதாரணமாகச் சொல்லலாம்.

Never Hear Again

Never Hear Surf Music Again பழைய கிளாஸிக் பாடல்களை நினைவுபடுத்துவதாக இருந்தாலும் ஆல்பத்திலேயே எனக்கு மிகவும் பிடிக்காத பாடல் இதுவே.. அழகாக ஆரம்பிக்கிற இப்பாடல் நடுவில் தேங்கி பழைய ரெக்கார்டுகளைப் போல ரிப்பிட் செய்யும் இசையால் தொந்தரவாகவும் இருக்கிறது. ஆனால் அது தவிர்த்து பாடல் ஓரளவு நன்றாகத்தான் இருக்கிறது. பாடலின் தலைப்பைப் போல திரும்ப கேட்டுவிடாதீர்கள்!!


Classicals

சில கிளாஸிக் பாடல்கள் இந்த தொகுப்பில் காணக்கிடைக்கின்றன/

Nocturne No 2 In E Flat, Op 9 (என்ன தலைப்புடா இது!!?) ஒரு சின்ன பியனோ பாடம். ஒவ்வொரு கட்டையும் தனித்தனியாக இசைமீட்ட யாராவது காதலர்களாக இருந்தால் நடனம் ஆடிவிடுவார்கள். அதே காதலர்கள் ஒரு இங்கிலிஸ் முத்தம் கொடுத்து ஸ்பீடாக ஆடினால் எப்படியிருக்கும் Ca Plane Pour Moi எனும் பாடல் ஒரு நல்ல ஹம்மிங் பாடல். இது ஒரு கிளாஸிக் பாடல். வரியே புரியாவிட்டாலும் கேட்பதற்கு மிக அழகான ரொமண்டிக் இசை!! அதேபோல If You Love Me என்ற இன்னொரு கிளாஸிக் பாடலும் உண்டு. 1977ல் வெளியான இப்பாடலைப் பாடியவர் எஸ்தர் ஃபிலிப்ஸ் எனும் பெண்மணி.. இவரது குரல் மிக அருமையாக இருக்கிறது...Lovely Day அதன் தலைப்பைப் போலவே காதல் தோய்ந்த இசையில் ஆரம்பிக்கிறது. பாடலைக் கேட்கும் போதே ஒரு ரொமண்டிக் இசை நடனமாடிக் கொண்டிருப்பதை உணரலாம்...

Rahmania

இவையெல்லாம் தவிர்த்து ரஹ்மானுக்கு உண்மையான தீனியாக பின் வரும் பாடல்களைச் சொல்லலாம். Touch of the Sun, பியனோவும் மெளனமும் கலந்த கலவை. பாடலில் மெளனமே அதிகம் ஆதிக்கம் செலுத்தியிருப்பதால் மிக நிசப்தமான சூழ்நிலைகளில் கேட்பதால் நமது ஆழ்மனது உணரப்படும். அதைப் போலவே The Canyon ஒரு இன்ஸ்ட்ருமெண்டல். If I Rise பாடலை மையப்படுத்தி வரும் கோரஸ் மற்றும் ஊது கருவிகள் (கருவிகள் பெயர் எனக்குத் தெரியாது என்பதால் ஏதாவது ஒரு Brass Instrument என்று வைத்துக்கொள்ளுங்கள்) கேட்கும் பொழுது நினைவுகள் மீளுவதை உணரமுடிகிறது... Harshdeep Kaur இன் ஹம்மிங்கில் தொடங்கும் R.I.P, காதுகளின் வழியே இதயத்தை ஆக்கிரமித்து அதன் துடிப்பில் உடலெங்கும் ஜிவ்வென்று ஏறுவதை உணரமுடிகிறது. ஹம்மிங்கிலேயே செல்லும் R.I.P ரஹ்மானின் ஆகச்சிறந்த மெலடிகளில் ஒன்று. மெல்ல மெல்ல ஹம்மிங்கிலிருந்து எழுந்து இசை உயர்கிறது. நிறைவடைகிறது. அடுத்ததாக Acid Darbari ஒரு மிகச்சிறந்த பாடல். (தர்பாரி ராகம்??) புல்லாங்குழல் இழைந்த ரஹ்மானியப் பாடல். ஒரு ஆன்மீக மணம் இசையெங்கும் பரவிக்கிடக்கிறது. குழல், மணி, வயலின் ஸ்ட்ரிங் என சுத்தமான இந்திய இசை! கேட்கும் போதே பறந்துவிடுவதைப் போன்ற உணர்வு.. இவற்றைக் காட்டிலும் டைடோவுடன் இணைந்து ரஹ்மான் பாடிய If I Rise ஆல்பத்தின் ஹைலைட் பாடல்!! மெல்ல மியூஸிகல் ஹம்மிங்கிலிருந்து (சரியான இசைக் கருவியின் பெயர் தெரியவில்லை) Dido வின் குரலுக்கு மாறுகிறது. டைடோவின் குரல் ஹைபிட்சில் பாடினாலும் அது மென்மையாகவே இருக்கும். ஒருமுறை நீங்கள் கேட்டுப் பார்த்தால் தெளிவாகிவிடும். எப்பொழுதும் போல டைடோ மெல்ல ஆரம்பித்த விதத்தைப் பார்க்கும் பொழுது அவளது பழைய பாடல்கள் ஞாபகத்திற்கு வருகின்றன. ஆல்பத்திலேயே இந்த பாடல்தான் சிறந்தது என்று தெரிந்துகொண்ட ரஹ்மான் டைடோவோடு சேர்ந்து தனது மந்திரக்குரலில் பாடியிருக்கிறார். கூடவே ரஹ்மானின் ஹைலைட் கோரஸும் சேர்ந்தால்?? அதுவும் குழந்தைகள் கோரஸ்!!.... ரஹ்மானின் பாடல்களில் ஒரே ஒரு ட்யூன் மட்டும் பாடல் முழுக்க ஒலித்துக் கொண்டேயிருக்கும். விண்ணைத்தாண்டி வருவாயா படத்தில் ஓமணப்பெண்ணே ஒரு சிறந்த எடுத்துக் காட்டு.. If I Rise பாடலிலும் அதைப் போன்று தொடர்ந்து மியூஸிகல் ஹம்மிங் ஒலிக்கும்படி இசைத்திருக்கிறார் இசைப்புயல். ஆகமொத்தத்தில் ஒரு மிகச்சிறந்த இந்திய சாயல் உள்ள பாடல் என்பதில் சந்தேகமேயில்லை... ஆனால் டைடோவின் கேரியரில் இதைவிட Thank You, Life for Rent, Don't Believe in Love போன்ற அநேக பாடல்கள் உள்ளன. ஒருவேளை கிராமி கிடைத்தால் டைடோவுக்கு இதுதான் முதல் கிராமியாக இருக்கும்!!!

மொத்தத்தில் ரஹ்மான் இசையமைத்த அனைத்துமே மெலடி மற்றும் கிதாரை மையப்படுத்தியே இருக்கிறது. படத்தின் ஸ்கோர், மூன்று லிபரேஷன் பாடல்களும் RIP, Acid Darbari மற்றும் If I Rise ஆக இருக்கலாம்.. காதல், சோகம், வெற்றி, விடுதலை, அகப்படல், போன்ற ஒவ்வொரு உணர்வுகளுக்கும் தகுந்தமாதிரியான இசை படம் நெடுக இருக்கலாம்... ஒரு மிகச்சிறந்த பின்னணி இசை என்பதாலேயே கோல்டன் க்ளோபுக்கு பரிந்துரைக்கப்பட்டிருக்கிறது என்பதில் சந்தேகமேயில்லை... காட்சிகளோடு பார்க்கும் பொழுது இசையின் மடங்கு இன்னும் பெரிதாகலாம்.......... என்னைப் பொறுத்தவரையில் மேற்கத்திய+இந்திய இசைக் கலவை வழங்கியிருக்கும் ரஹ்மானின் இந்த படத்திற்கு நிச்சயம் ஆஸ்கரும் கோல்டன் குளோபும் கிடைக்க வாய்ப்பிருக்கிறது!!! ஹான்ஸ் ஜிம்மரின் இன்செப்ஷன் மட்டுமே ரஹ்மானுக்குப் போட்டியாக இருக்கும் என்று நம்புகிறேன்....

Songs List

1. "Never Hear Surf Music Again"
2. "The Canyon"
3. "Liberation Begins"
4. "Touch Of The Sun"
5. "Lovely Day"
6. "Nocturne No.2 in E flat, Op.9 No.2"
7. "Ça plane pour moi"
8. "Liberation In A Dream"
9. "If You Love Me (Really Love Me)"
10. "Acid Darbari"
11. "R.I.P."
12. "Liberation"
13. "Festival"
14. "If I Rise"

To Listen:

http://www.foxsearchlight.com/127hours/

To download

Mediafire :

http://www.mediafire.com/?tmi4t4rd8gpergm

Torrent :

http://thepiratebay.org/torrent/5935264




Direction : K. S. Ravikumar
Written : Kamal Haasan
Starring : Kamal Haasan, Trisha Krishnan, R. Madhavan, Sangeetha
Music : Devi Sri Prasad
Year : 2010
Language : Tamil
Genre : Romantic Comedy

மன்னார், மதனகோபால், அம்புஜாஸ்ரீ ஆகிய மூவரும் மன்மதன் அம்பு...

ரொமாண்டிக் காமெடிகளில் கமல் படம் மட்டும் தமிழ் திரைப்படங்களில் தனித்து இருக்கும். அதற்கு மிக முக்கிய காரணம் கிரேஸி மோகனின் வசனங்கள். ஆள்மாறாட்டம், வசனகுளறல், என நொடிக்கு நொடி காமெடி வழங்குவதில் மனிதர் கில்லாடி. மன்மதன் அம்புவில் வசனங்கள் கமல் என்று டைட்டிலில் போட்டாலும் கிரேஸியின் துணையின்றி கமலால் செய்திருக்க முடியுமா என்று சந்தேகம் வலுக்கிறது.. 


திரிஷா ஒரு நடிகை. அவரைக் காதலித்துக் கொண்டிருக்கும் மாதவன் பெரிய தொழிலதிபர். திரிஷாவின் ஷூட்டிங்கில் சூர்யாவோடு ஆடுவதையும் கேரவனில் சென்று மேக்கப் போடுவதையும் பார்த்த மாதவனுக்கு சந்தேகம் ஆரம்பிக்கிறது. அதனைத் தீர்வு செய்ய மாதவன் முடிவெடுக்கிறார். தனது புதிய அமெரிக்க காரான Hummer ஐ ஓட்டிப் பார்க்கச் சொல்லி கொடைக்கானல் மலைப்பாதையில் இருவரும் செல்கின்றனர். மாதவன் தான் சந்தேகப்பட்டதைக் கேட்கையில் கார் ஓட்டிக்கொண்டிருக்கும் திரிஷா மாதவனோடு விவாதித்தே சட்டென எதிரே வந்த காரில் மோதிவிடுகிறார். சுதாரித்து காரை நிறுத்திவிட்டு இறங்குகையில் திரிஷாவைக் கண்ட ரசிகர்கள் உற்சாகமடைகிறார்கள். இந்த குழப்பத்தில் மாதவனும் திரிஷாவும் பிரிந்துவிடுவதாக முடிவெடுத்து கிளம்பிவிடுகிறார்கள்.

மூன்று வருடங்கள் கழித்து பாரீஸில் திரிஷாவும் அவரது தோழியான சங்கீதாவும் விடுமுறையைக் கழிக்க வருகின்றனர். தனது பழைய சம்பவங்களை அசைபோட்டுக்கொண்டிருக்கும் திரிஷாவிடம் ஒருவன் பிக்பாக்கெட் அடிக்க, அதனைத் தடுக்க எண்ட்ரியாகிறார் கமல்ஹாசன். தனது நண்பனான ரமேஷ் அரவிந்திற்கு கேன்சருக்கான ஹீமோதெரபி சிகிச்சைக்காக மாதவனிடம் தற்காலிகமாக கமல்ஹாசன் ஒரு ஸ்பை போன்று வேலை செய்கிறார். திரிஷா விடுமுறையில் யாரோடு கழிக்கிறார்? என்ன செய்கிறார் எனும் சந்தேகக் கண்ணோடு பார்க்கச் சொல்லுகிறார் மாதவன். ஒரு கட்டத்தில் திரிஷா நல்ல பெண்மணி எனும் சர்டிஃபிகேட் கொடுக்கும் கமலுக்கு பணம் கொடுக்காமல் கல்தா கொடுக்கிறார் மாதவன். இதனால் வேறுவழியில்லாமல் கமல்ஹாசன் பொய் சொல்ல ஆரம்பிக்கிறார். திரிஷாவுக்கும் இன்னொரு நபருக்கும் தொடர்பு இருக்கிறது என்று. அந்த இன்னொரு நபராக தன்னையே கற்பனித்துக் கொள்கிறார். இதனைக் கேட்கையில் சூடாகும் மாதவன் கமலுக்கான பணத்தை செட்டில் செய்வது மட்டுமின்றி தொடர்ந்து வேலை செய்யவும் சொல்கிறார். ஒரு கட்டத்தில் கமல்ஹாசனின் மனைவியின் இறப்புக்கு திரிஷாதான் காரணம் என்றறிந்த பின்னரும் என்ன செய்யமுடியும் இனிமேல் என்று தத்துவம் பேசி திரிஷாவைப் பின் தொடர்கிறார் கமல். திரிஷாவுக்கு கமல் மேல் காதல் வந்துவிடுகிறது. படம் முழுக்க பொய் சொல்லிக் கொண்டு திரிஷாவை நல்ல பெண்மணியாகவும் அதேசமயம் இன்னொரு நபரோடு தொடர்பு இருப்பதாகவும் சொல்லுவதால் ஆத்திரமடையும் மாதவன் நேராக கிளம்பி பாரீஸுக்கு வந்து திரிஷாவையும் கமல்ஹாசனையும் சந்திக்கிறார். முடிவு என்னானது என்பது வெள்ளித்திரையில்......

கமலும் சங்கீதாவும் சேர்ந்து செய்யும் நாடகங்கள், மாதவனின் தள்ளாட்ட நடிப்பு, ஓரிரு காட்சிகளிலே மட்டும் வந்தாலும் அசத்தும் ஸ்ரீமன், சங்கீதாவின் குழந்தைகளாக வரும் பொடுசுகளின் அறியாத்தன காமெடி, கிளைமாக்ஸ் முழுக்க நிறைந்திருக்கும் குழப்ப காமெடி, தொய்வடையாத கதைப்போக்கு போன்றவை படத்தின் நிறைகள். பொதுவாக கே.எஸ்.ரவிக்குமார் படங்களில் நிறைய பாத்திரங்கள் வந்து செல்வார்கள். ஆரம்பத்தில் சூர்யா ஒரு பாடலுக்கு ஆடிச் செல்கிறார். பின்னர், உஷா உதூப், ரமேஷ் அரவிந்த், ஊர்வசி, களவாணி புகழ் ஓவியா, மலையாளிகளாக வரும் தம்பதியினர் என அறிமுகங்கள்.. மலையாள தம்பதியினர் ஒரு கட்டத்தில் எரிச்சலாக இருந்தாலும் பின்னர் காமெடியில் செட்டில் ஆகிவிடுகிறார்கள். படத்தில் ஒரே ஒரு சண்டைக்காட்சி மட்டுமே... அதுவும் கமல் இண்ட்ரோ ஆகும் பொழுது. ஆனால் கிளைமாக்ஸ் ஒரு குழப்பத்தனமான முடிவு. தனது முந்தைய படமான உன்னைப்போல் ஒருவனில் ஜோடியைக் கண்ணிலேயே காண்பிக்காததாலோ என்னவோ இதில் சற்றே இறங்கி திரிஷாவை லவ்வியிருப்பது செயற்கைத்தனமான கதைப்போக்கின் முடிவு. ஒரே ஒரு பாடலுக்கு மட்டுமே வந்தாலும் வெகு அழகான நேர்த்தியான நடிப்பு கமலின் மனைவியான ஃப்ரான்ஸ் நாட்டுப் பெண்ணுக்கு...

கமலுக்கு பெரிய இண்ட்ரோ கொடுக்கலாமா இல்லை எந்திரனில் ரஜினியைப் போல சாதாரணமாகவே கொடுத்துவிடலாமா எனும் சந்தேகத்தோடு அவருக்கு இண்ட்ரோ கொடுத்திருப்பதாகத் தெரிகிறது. வயது ஏறிக் கொண்டிருப்பதாலேயோ அல்லது உண்மையிலேயே கதைக்காகவோ கமல் (கிட்டத்தட்ட) ஜோடியின்றி நடித்திருக்கிறார். ஆனால் கமலைக் காட்டிலும் மாதவனும் சங்கீதாவும் நன்றாக நடித்திருக்கிறார்கள்.. பொதுவாக கமலின் இந்தமாதிரியான காமெடிப் படங்களில் ஒரேவகையான தீம்தான் இருக்கும். அது சந்தேகப்படுவது... சதிலீலாவதி, அவ்வை சண்முகி, பஞ்சதந்திரம் போன்ற கமலது முந்தைய படங்களிலும் சந்தேகப்படுதல் அந்தந்த படங்களின் முதுகெலும்பாக இருக்கும். மன்மதன் அம்பும் விதிவிலக்கல்ல.. மாதவன் படம் முழுக்க சரக்கடித்துக் கொண்டுதான் வருகிறார். அவர் செய்யும் காமெடிகள் அற்புதமாக இருக்கிறது. எனக்குத் தெரிந்து மாதவன் அருமையான காமெடி நடிப்பு இப்படத்தில்... திரிஷா ? விண்ணைத்தாண்டி வருவாயாவில் இருந்த திரிஷா இல்லை... ஒரு நடிகை திரிஷா... பெரிதாக அப்படியொன்றும் நடிப்பில்லை என்றாலும் ஓகே ரகம். 

கிரேஸிமோகன் இப்படத்தில் இருந்திருக்கவேண்டும். கமல் காமெடி வசனங்களில் புகுந்து விளையாடியிருக்கிறார். குறிப்பாக சங்கீதா பேசும் வசனங்கள்.. சரக்கடித்துவிட்டு ஸ்ரீமன்னும் மாதவனும் குழம்பிக்கொள்ளும் காட்சிகள் படம் முழுக்க மாதவன் பேசும் வசனங்கள், சங்கீதாவும் கமலும் போடும் நாடக ஒத்திகைகள் எல்லாமே செம காமெடி. அதேசமயம் இண்டலக்சுவலாகவும் ஓரிரு வசனங்கள் உண்டு. இந்த உலகத்துல நேர்மையா இருக்கற பொண்ணுக்கு திமிர்தான் வேலி, வீரத்தோட மறுப்பக்கம் மன்னிப்பு, வீரத்தோட உச்சகட்டம் அகிம்சை என சில உண்டு. யதார்த்தமாக இருக்கவேண்டும் என்பதாலோ என்னவோ ஆங்கில வசனங்கள் மிக அதிகம். கெளதம் மேனன் படத்திற்கு வந்துவிட்டோமோ என்றும் தோணும். ஒரு சில இடங்களில் கோபத்தையும் வெளிப்படுத்தியிருக்கிறார். நான் பொறுத்துக்குவேன், தமிழ் பொறுக்குமா?.... தமிழ் தெருப்பொருக்கும்.... நீங்க ஏன் தமிழில் பேசி நடிக்கிறதில்லை என்று கமல் கேட்குமிடங்கள், கமல் தன்னைப் பற்றி சொல்லும் பொழுது வலியை வார்த்தையால் சொல்லுவது போன்றவை கமல் டச்... ஆனால் படத்தின் ஆரம்பம் காமெடிப்படமா இல்லை ஏதாவது ட்ராமா சப்ஜெக்டா என்று சோதிக்க வைக்கிறார்கள்... பிற்பாதி முழுக்க காமெடி, மாறாக முற்பாதியில் வெகு குறைவு!!

படத்தில் லெவ் ரெக்கார்டிங் முறை உபயோகப்படுத்தப்பட்டிருக்கிறது. தமிழில் இந்தமாதிரி முயற்சிகள் வெகு அரிது. பாரீஸின் வெளிவீதிகளில் சுற்றுவதால் உண்மையாகவே கேட்கும் இரைச்சல்களும் வசனங்களும் ஓவர்லாப் ஆகும்போது ஒருசில இடங்களில் வசனம் புரியாமல் போக வாய்ப்பிருக்கிறது. படத்தின் டோன் (வர்ணம்) ஒரு ட்ராமா படத்தைப் போல இருந்தாலும் இது வெறும் கமலின் காமடிக்கூத்து என்பதை அவ்வப்போது நினைவூட்டிக்கொண்டேயிருந்தது. ஒரு ரிச்னெஸும் தெரிகிறது.. ட்ராமாவாக ஆரம்பிக்கும் காட்சிகள் சட்டென காமெடி ட்ராக்குக்கு மாறிவிடுவது சோபை. ஒரு நடிகை எதிர்கொள்ளும் பிரச்சனைகளை வெகு அழகாக காட்டியிருக்கலாம். ஆனால் அப்படியுமில்லை. ரமேஷ் அரவிந்த் வரும் காட்சிகள் தேவையற்றது. எனினும் கதைப்படி அக்காட்சிகள் எந்தவொரு அழுத்தமும் தரவில்லை. ஆகமொத்தத்தில் மன் மதன் அம்பு - சிரிப்பு மட்டுமே தேவை என்பதற்காக பூசி மெழுகப்பட்ட திரைக்கதை இயக்கம்...

இசை? பிண்ணனி இசை மோசம்... ஆனால் இந்த படத்திற்கு இது போதும் என்று நினைத்தார்களோ என்னவோ, ரமேஷ் அரவிந்தைக் காண்பிக்கையில் ஒரு செண்டிமெண்டல் இசை, கமல் அழுகையில் ஒரு செண்டிமெண்டல்... ஒருசில படங்களில் இசையே படத்தைத் தூக்கிக் கொண்டு செல்லும்.. இப்படத்தில் வேண்டுமே என்பதற்காக இசைக்கப்பட்டிருக்கிறது. பாடல்களில் நீ நீலவானம் மட்டுமே மனதில் நிற்கிறது. இப்பாடல் ரிவர்ஸபில் முறையில் படமாக்கப்பட்டிருக்கிறது. தமிழுக்குப் புதியது என்றாலும் அதுவும் ஒரு காப்பியாகவா இருக்கவேண்டும்?? Cold Play யின் The Scientist பாடல் ரிவர்ஸ் குரோனாலஜி முறையில் எடுக்கப்பட்ட பாடல் அப்பாடலில் Chris Martin ன் கோ ஆக்டருக்கு ஆக்ஸிடண்ட் ஆனபிறகு வரும் சம்பவங்களை ரிவர்ஸில் எடுத்திருப்பார்கள் நீ நீலவானம் பாடலில் கமலின் மனைவிக்கு ஆக்ஸிடண்ட் ஆவதற்கு முன்பு நடந்த சம்பவங்களை ரிவர்ஸில் எடுத்திருக்கிறார்கள். அவ்வளவே வித்தியாசம். ரிவர்ஸில் காட்சிகள் போகும் பொழுது பாடலுக்கு ரிவர்ஸிலேயே வாயசைக்கவேண்டும் அப்பொழுதுதான் நமக்கு பாடுவதைப் போலவும் காட்சிகள் ரிவர்ஸில் செல்வதைப் போலவும் தோன்றும். எனினும் ஓரிரு இடங்களில் Sync ஆகவில்லை..

ஒளிப்பதிவு மனுஷ் நந்தன்... புது ஆள் என்று நினைக்கிறேன். எந்த இடத்திலும் பிசகில்லாத ஒளிப்பதிவு.... கிட்டத்தட்ட 75 % படம் முழுக்க முழுக்க கப்பலிலேயே படமாக்கப்பட்டிருக்கிறது. மிகப்பிரம்மாண்டமான கப்பலை இறுதியில் அழகாக காட்டியிருப்பது தமிழுக்கு புதுசுதான். கொடைக்கானல், பாரீஸ் மற்றும் கப்பலின் உள்தளங்கள் ஆகியவை சிறப்பான ஒளிப்பதிவாக்கத்தில் இயக்கப்பட்டிருக்கின்றன. இயக்கம் கே.எஸ்.ரவிக்குமார் என்றாலும் கமல்தான் படம் முழுக்க தெரிகிறார்.

மொத்தத்தில் மன்மதன் அம்பு சிரிக்க மட்டும்.....

23/12/2010

2010 - ஒரு பார்வை - 2

by ஆதவா |

முந்தைய பாகத்தை ஒருமுறை படித்துவிட்டு வரவும்....

5. எந்திரன்




பிரம்மாண்டமான கமர்ஷியல் சைஃபை படம். தொழில்நுட்ப ரீதியாக தமிழ் சினிமாவில் பல புதுமைகளைக் கொண்டுவந்த எந்திரனால் ஷாருக்கின் ரா ஒன் மற்றும் முருகதாஸின் ஏழாம் அறிவு போன்றவை இன்னும் தொழில்நுட்ப ரீதியில் சிறப்பாகத் தரவேண்டும் என்ற உந்துதலும் கிடைத்தது. ஒரு ரோபோட்டுக்கு காதல் வந்தால் அது என்ன செய்யும் எனும் ஒன்லைனர் ஸ்டோரி. பல படங்களிலிருந்து பெறப்பட்டது எனும் குற்றம் சாற்றப்பட்டாலும் நந்தலாலா போல காட்சியை அப்படியே காப்பியடிக்காமல் இருந்தது ஒரு சின்ன ஆறுதலும் கூட. ரஜினி எனும் 62 வயது இளைஞரை நன்றாக வேலை வாங்கி ஓரளவு நடிப்பையும் உள்வாங்கி ஷங்கரால் எடுக்க முடிந்திருக்கிறது. எந்திரனின் மேக்கிங் காட்சிகளில் அவர்கள் எவ்வளவு சிரமப்பட்டிருக்கிறார்கள் என்பது தெரியவந்தது. எந்திரனில் பல குறைகள் இருந்தாலும் நம்மைக் காட்டிலும் பெரிய சினிமாத்துறையான இந்தியும் எந்திரனைத் திரும்பிப் பார்க்க வைத்தது ஒரு சாதனைதான்.!! இந்தி பதிப்பில் மட்டுமே கிட்டத்தட்ட 30 கோடியைத் தாண்டியிருக்கிறது வசூல். இத்தனைக்கும் டப்பிங் படம்.

4. மதராசப்பட்டினம்



கிரீடம் படத்தை டிவியில் தான் பார்த்தேன். வழக்கமான தமிழ் சினிமாவிலிருந்து கொஞ்ஞ்ஞ்சம் மாறியிருந்த அந்த படம் எனக்குப் பிடித்திருந்தது. அதே இயக்குனரின் வண்ணத்தில் மதராசப்பட்டினம் ஒரு தமிழ் டைட்டானிக் என்று விமர்சகர்கள் சொல்லிவிடுகிறார்கள். ஒரேமாதிரியான காதல் கதைகளைப் படமெடுப்பதில் நம் ஆட்களை மிஞ்ச எவருமில்லை, விஜயும் விலக்கல்ல. என்ன... இது காதல் சுதந்திரப்போராட்டம்... ஹேராம் படம் முழுக்க ஒரு சுதந்திர வாசம் இருக்கும். ஆனால் இந்த படத்தில் அப்படி துளிகூட இல்லாமலிருந்தது மிகப்பெரிய குறை. தவிர ஓரிரு வரலாற்று பிழைகளும் படத்தில் அடக்கம். சலவைத் தொழிலாளியான ஆர்யாவைக் காதலிக்கும் எமி ஜாக்ஸன் சந்தர்ப்ப சூழ்நிலையால் பிரிந்து இந்தியாவை விட்டு வெளியேறுகிறார். பின்னர் பலநாட்கள் கழித்து வந்து பார்க்கிறார். இது படத்தின் கதை. பழைய சென்னையை ஓரளவு காட்டியது, எமி ஜாக்ஸனின் அழகு நிறைந்த நடிப்பு, ஓரளவு சலிப்பில்லாமல் போன திரைக்கதை ஆகியவையோடு ஹிஸ்டரி படங்கள் எடுக்க சிரமப்பட்டு வரும் தமிழ் சினிமாவுக்கு இப்படம் ஒரு சான்று ஆகியவையே படத்தின் நிறை...

3. களவாணி.




நான் எங்கள் அக்கா கிராமத்திற்குள் சென்றால் கையில் கேமரா இல்லாமல் நுழைய மாட்டேன். பார்ப்பதையெல்லாம் போட்டோ பிடிப்பதையே தொழிலாக வைத்திருப்பேன். ஒருவேளை கையில் ஒரு வீடியோ கேமரா கொண்டு சென்று ஒரு காதல் ஜோடியை படமெடுத்தால் எப்படியிருந்திருக்கும்... அப்படியிருந்தது களவாணி. பிரம்மாண்டம் என்ற பெயரில் வீணாக காசை செலவு செய்து தியேட்டருக்கு வருபவர்களைத் தலைவலிக்கச் செய்யும் படங்களுக்கு மத்தியில் மிகக் குறைந்த செலவில் எடுக்கப்பட்ட களவாணி உண்மையிலேயே 2010 ல் சிறந்த திரைப்படமே. களவாணியாகத் திரியும் விமலுக்கும் ஓவியாவுக்கும் காதல் ஏற்பட்டு பின் வரும் விளைவுகளே திரைப்படம். நண்பர் குலாம். அழகான ஓவியா, கிராமப்புறம், ஓவர்லாப் வசனங்கள், அலுக்காத திரைக்கதை ஆகியவையே நிறை. முதல் படத்திலேயே சிக்ஸர் அடித்திருக்கிறார் இயக்குனர் சற்குணம். படத்தில் நிறைய குறையிருந்தாலும் நகைச்சுவை கொண்டே ஓட்டையை சரிசெய்ய முயன்றிருக்கிறார்கள். களவாணி போன்ற அலுக்காத அதேசமயம் காசை பதம்பார்க்காத திரைப்படங்கள் தேவையே.. எனினும் காதல் கதையாக இருப்பதைத் தவிர்த்திருக்கலாம்.

2. விண்ணைத்தாண்டி வருவாயா...



மீண்டும் ஒரு காதல்.. எந்தவொரு வித்தியாசமுமில்லாமல்.. ஆனால் முழுக்க முழுக்க படத்தைப் பார்க்கத் தூண்டியிருப்பது கெளதம் மேனம், ஏ.ஆர்.ரஹ்மான், சிம்பு, மற்றும் திரிஷா.. ஒரு சாதாரண காதல் கதையை எவ்வளவு பிரம்மாண்டமாக சொல்லமுடியும்? சிம்பு தன் மேல்வீட்டு பெண்ணான திரிஷாவைக் காதலிக்க வழக்கம்போல வீட்டில் எதிர்ப்பு... திருமணம் ஆனதா? இல்லையா? என்பது படத்தின் முடிவு.. இதுவரை எந்த காதல் படங்களிலும் இவ்வளவு வசனங்களைப் பார்த்ததேயில்லை. மிக இயல்பான நாடகத்தனமற்ற வசனங்கள். சில சமயம் சிலிர்ப்பூட்டும் வசனங்கள்... படம் முழுக்க ஏ.ஆர் ரஹ்மான் ஆட்சியே செய்திருக்கிறார். அவரது பெஸ்ட் படங்களில் இதுவும் ஒன்று. இதுவரை பார்த்திராத சிம்பு, திரிஷா.. ஒவ்வொரு படத்தின் மூலமும் கெளதமும் ஏ.ஆர் ரஹ்மானும் படிக்கட்டுகளில் ஏறிக்கொண்டேயிருக்கிறார்கள்... ஓரிரு இடங்களில் படம் இழுவை போலத் தெரிந்தாலும் இசை வந்து குறையை அடைத்துவிடுகிறது. என்னைக் கேட்டால் விண்ணைத் தாண்டி வருவாயா ஒரு மியூஸிகல் ரொமான்ஸ் என்றே சொல்வேன். இந்த படத்திலும் சில காட்சிகள் ஆங்கிலப் படங்களில் வந்ததைப் போலவே இருந்தது என்றாலும் பெரிதாக யாரும் கண்டுகொள்ளவில்லை!!

1. அங்காடித் தெரு.



வசந்தபாலனின் இன்னுமொரு மாஸ்டர்பீஸ். கடைகளில் வேலை செய்யும் இளைஞர்கள், பெண்கள் படம் அவஸ்தையை ஒரு குறிப்பிட்ட கடையை வைத்தே சொல்லியிருக்கும் விதத்தில் வசந்த பாலனின் தைரியத்தைப் பாராட்டலாம். இயக்கம் எப்படியோ அப்படியே வசனங்களும்.. ஜெயமோகன் அக்னிக்குஞ்சாக படத்தில் வார்த்தைகளைத் தெறித்திருக்கிறார். தென்மாவட்டத்திலிருந்து வேலைக்காக சென்னைக்கு வரும் மகேஷ் வேலையிடத்தில் அடாவடியாக இருக்கும் அஞ்சலியோடு மோதி பின் காதல் செய்கிறார். அந்நிறுவனத்தில் காதல் செய்வது பிடிக்காது என்பதால் ஒரு சூழ்நிலையில் இருவரும் வெளியேறுகிறார்கள். எப்படி வாழப்போகிறார்கள் என்பது மீதி.. இந்தமாதிரியான படங்களில் நகைச்சுவை சிலசமயம் ப்லாக் காமெடி போன்றிருக்கும். தான் செய்யும் வேலை எத்தனை கஷ்டமாக இருந்தாலும் வீட்டுச் சூழ்நிலையின் பொறுத்து அதனை எப்படி லாவகமாக கையாள்வது என்று ஒவ்வொரு கடைப் பையன்களுக்கும் தெரிந்தேயிருக்கும். படத்தில் வரும் ஒவ்வொரு பாத்திரமும் கனமானவையாக இருந்ததும் சென்னையில் ஒருவர் எப்படியெல்லாம் முன்னேறிவிடுகிறார்கள் என்பதை கழிவறை சுத்தம் செய்யவந்தவர் பின் அதற்கே ஓனர் ஆவது போன்ற காட்சியில் சொல்லியிருப்பார்கள்.. பாடல்களும் அருமையாக இருந்தது.. ஒருசில விஷயங்களைத் தவிர்த்து கொஞ்சம் கனத்தைக் கூட்டியிருந்தால் ஒரு பர்ஃபெக்ட் உலகத் திரைப்படமாக ஆகியிருக்கும்.. 2010 ல் வெளிவந்த அத்தனை படங்களிலும் சிறந்த படம் இதுவொன்றே!!

இந்த பத்து படங்களிலும் பிரதானமாக இருப்பது காதல் மட்டுமே நந்தலாலா தவிர.............. இயக்குனர்கள் இன்னும் காதலை விட்டு இறங்கி வரவேயில்லை. ஆனால் யாரும் வித்தியாசமாக காதலைச் சொல்லுவதாகவுமில்லை!! ஆனால் ஜெயமோகன், எஸ்.ரா போன்றவர்கள் களமிறங்குவதும் ஒருசில நல்ல திரைப்படங்கள் வருவதும் தொடர்ந்தால் தமிழ் சினிமாவும் நல்ல நிலைமைக்கு உயரும் வாய்ப்பு இருக்கிறது!!

21/12/2010

2010 - ஒரு பார்வை - 1

by ஆதவா |

எந்த வருடங்களுமில்லாது இந்த வருடத்தில்தான் அதிக சினிமாக்களைப் பார்க்கவேண்டியிருந்தது. நண்பர்கள் யாராவது ஒன்பது மணிக்கு அழைத்து “கிளம்பலாமாடா?” என்றால் அடுத்த அரைமணி நேரத்திற்குள் ஏதாவது ஒரு தியேட்டரில் நின்றுகொண்டிருப்போம். எனது சிந்தனைகளும் நண்பர்களது சிந்தனைகளும் வேறுவேறானவை என்பதால் அதிரடிக் கார மச்சான் படத்திற்கு முன்னுரிமை கொடுத்துச் செல்லுவதுண்டு. பெரும்பாலும் படத்தைப் பார்ப்பதைவிட நாங்கள் பேசிக் கொள்வது அதிகமாக இருக்கும்.. ஆனாலும் அதிகம் அழுததுதான் ஞாபகத்திற்கு வருகிறது. அப்படி அழுதும் அழுகாமலும் சுமாராகவோ சூப்பராகவோ பார்த்த ஒரு சில படங்களைப் பட்டியலிடலாம்....


10. நான் மகான் அல்ல / பாஸ் எ பாஸ்கரன்





ஒரு சராசரி மனிதன், எதிர்பாராத விதமாக தந்தையை இழந்து அதற்குப் பழி வாங்கும் இந்திய சினிமாக்கள் எழுதிமுடித்த புதிய கதையே நான் மகான் அல்ல. சின்னச் சின்ன காமெடிகள். இப்படத்தின் மிகப்பெரும் பலம். ஒரு சராசரி தமிழ் மசாலா படங்களிலிருந்து கொஞ்சூண்டு தள்ளி வந்த படம். இப்படத்தில் கார்த்தியின் நகைச்சுவை கலந்த நடிப்பு ஓரளவு ரசிக்கும்படியாகவும் ஓரிரு இடங்களில் எரிச்சலூட்டவதாகவும் இருந்தாலும் ஒட்டுமொத்தமாக பார்க்கையில் “சுறாவுக்கு எது எவ்வளவோ பரவாயில்லை” என்ற பேச்சு எழுகிறது. இப்படத்தில் கார்த்தியின் தந்தை ஜெயப்பிரகாஷ் வரும் காட்சிகள் அருமையானவை. படத்தின் நீளத்தைக் குறைத்திருந்தால் இன்னும் நன்றாக இருந்திருக்கும்.... இப்போதெல்லாம் தியேட்டரில் இரண்டு மணி நேரமே அமர்ந்து பார்க்க முடிவதில்லை.
பாஸ் எ பாஸ்கரன் படத்தில் வெட்டியாக ஊர் திரியும் அரியர்ஸ் ஆர்யா, உறுப்படியாக ஏதாவது செய்ய முற்பட்டு டுடோரியல் ஆரம்பித்து முன்னேறுவதே கதை. இப்படத்தில் சந்தானத்தைத் தூக்கிவிட்டால் படத்தில் ஒன்றுமேயில்லை. கதையே இல்லாத நகைச்சுவைப் படங்கள்தான் இப்பொழுது ட்ரெண்ட் போலும். கோயம்புத்தூரில் எந்திரன் வந்து போனபிறகும் இப்படம் ஓடிக்கொண்டிருப்பதைப் பார்க்கும்பொழுது புரிகிறது. குறிப்பிட்டு சொல்லும்படியாக எந்த காட்சிகளும் இல்லை. எனினும் இப்படத்தை விடவும் மொக்க படங்கள் வருவதால் வேறு வழியின்றி பத்தாவது இடம்.>!!

9. மைனா




கமல் சொன்னார் அழுதேன் என்று, உதயநிதி சொன்னார் இரண்டு நாட்கள் தூங்கவில்லை என்று ஒரு ஹைப் ஆக்கியிருந்தார்களேயொழிய படத்தில் அப்படியான ஒரு காட்சியுமில்லை. நாடகத்தனமான ஓரிரு காட்சிகள், மிகையாகவோ குறைவாகவோ கதாப்பாத்திரங்களின் நடிப்பு என கதை திரைக்கதை ஆகியவை அமைத்த இயக்கமும் சுமார் ரகமே... சிறுவயதிலிருந்தே தான் காதலித்த பெண்ணான அமலாவை திருமணம் செய்ய ஆசைப்படும் முரட்டு விதார்த், சந்தர்ப்ப சூழ்நிலையால் சிறைக்குச் செல்ல நேரிட, சிறையிலிருந்து தப்பித்து அமலாவை சந்தித்து இரு காவலர்களின் சிறையில் மலைக்காட்டில் செல்லும் பயணமே மைனா. இப்படத்தில் குறிப்பிட்டு சொல்லவேண்டிய ஒரே விஷயம் என்னவெனில் காவலதிகாரியின் கதையையும் மைனா கதையையும் கொண்டுவந்ததுதான்.. ஆனால் அதை இணைத்தது இயல்பாகத் தெரியவில்லை. திணிப்பாக இருக்கிறது. படம் முழுக்க மலைக்காடுகளில் பயணிப்பதால் கண்கள் முழுக்க குளுமை. ஆனால் வழக்கமாக வரும் படங்களிலிருந்து சற்று தள்ளி வந்திருக்கிறது எனும் அசட்டுத்தனமான சமாதானமே இப்படத்தைப் பற்றி பேச வைக்கிறது.


8. தமிழ்படம்



தமிழில் ஒரு முழுநீள ஸ்பூஃப் திரைப்படம் வந்ததே கிடையாது எனும் குறையைத் தீர்க்க வந்த படம். விஜய் டிவி லொள்ளு சபாவில் சந்தானம் இருந்தவரையிலும் படங்களை கிண்டல் செய்யும் பாணி வெகு பிரசித்தியாக இருந்தது. தமிழ்படம் நிச்சயம் தமிழ் சினிமாவில் ஒரு மைல்கல் என்றே சொல்லலாம். பல படங்களை, அதன் பாத்திரங்களை, காட்சிகளை என பலதரப்பட்ட முறையிலும் மாற்றியமைத்த பாணி மற்ற சினிமாக்கள் இத்தனை கேவலமாக எடுக்கப்பட்டு வருகின்றன என்று வஞ்சப்புகழ்கிறது. சிவா வின் சினிபாதையில் ஒரு முக்கிய திரைப்படம். ஒரு நகைச்சுவைப் படமென்றாலும் மிகுந்த தரமான ஒளிப்பதிவு நீரவ் ஷாவிடமிருந்து கிடைத்தது... இதில் நடித்த நடிகை திஷா பாண்டேவைத்தான் ஆளையே காணோம்..

7. இ.கொ.முரட்டு சிங்கம்



நான் சிறுவனாக இருந்த பொழுது தொலைக்காட்சிகளில் பழைய ஜெய்சங்கர் படங்களை விரும்பிப் பார்ப்பேன். அவர் குண்டுகட்டாக ஒரு மரு அல்லது மீசை வைத்துக் கொண்டு தொப்பி அணிந்து அது என்ன கலாச்சார எழவோ என்று தெரியாமலேயே ரசித்திருக்கிறேன். பிறகு உள்நாட்டு ரீதியிலான கலாச்சார மரபிலிருந்து அவை வரவில்லை என்றறிந்த பிறகு அப்படங்களும் வருவது நின்று விட்டிருந்தது. இச்சூழ்நிலையில் இரும்புக்கோட்டை முரட்டுச் சிங்கம் ஒரு அசாதாரண தைரியம் என்றே சொல்லலாம். சிம்புதேவனின் இயக்கத்தில் ஏற்கனவே வந்த படங்கள் உண்மையில் நிறைவை அளிப்பதாக இருந்தது. இதுவும் ஓரளவு... ஷோலேபுரம் எனும் ஊரை அடிமையாக்கி ஆட்சி செய்யும் கிழக்குக் கட்டை நாசரிடமிருந்து காப்பாற்ற முரட்டுச் சிங்கம் லாரன்ஸ் வரவழைக்கப்படுவதும் வழக்கம்போல கவ்பாய் கதைகளில் வரும் புதையலைத் தேடுவதுமே கதை. ஓரிரு இடங்களில் குறிப்பாக எம்.எஸ் பாஸ்கர் வரும் இடங்களிலெல்லாம் நகைச்சுவை பறக்கிறது. இப்படம் முழுக்க அவர் தமிழிலேயே பேசவில்லை என்பது குறிப்பிடத்தக்கது. விஷுவல் காட்சிகள், உடைகள், கவ்பாய் பாணியிலான பாத்திரங்கள், ஓரிரு நடைமுறை கிண்டல்கள் ஆகியவை பலம்...

6. நந்தலாலா.



ஒரு மிகச்சிறந்த படம் என்பது காட்சிகளின் வழியே பார்வையாளனுக்குக் கதையைச் சொல்லுவது மட்டுமின்றி கதையை உணர்த்தி மனதிற்குள் அசைபோடவைப்பதும் கூட. அப்படிப்பட்ட ஒரு திரைப்படத்தின் ஆக்கம் சுத்தமாக இருந்தாலொழிய அது சிறந்தபடமாகாது. நந்தலாலா சிறந்த படம் என்பதைக் காட்டிலும் அதனுடைய மூலம் இயக்குனர் மிஷ்கினுடையது அல்ல என்பதே பிரதானமாக இருக்கிறது. தாயைத் தேடிச் செல்லும் மனப்பிரழ்வுற்ற மிஷ்கின் மற்றும் அவரைப் போலவே தாயை நோக்கிச் செல்லும் சிறுவன் இருவரும் சந்திக்கும் மனிதர்கள், நெடிய பயணம் ஆகியவைதான் நந்தலாலா. குறியீடுகள் நிறைந்தது என்று பலர் சொல்லியிருந்தாலும் ஒவ்வொரு காட்சியிலும் அது என்ன குறியீடு, இது என்ன குறியீடு என்றெல்லாம் யோசிக்காமல் படத்தோடு ஒன்றியிருந்தது ஆறுதல். காமரா காட்சிக்கோணங்கள் இதுவரை வந்த படங்களிலேயே இவருடையது வித்தியாசமாகவும் சிறப்பாகவும் இருப்பது ஒன்றும் புதிதில்லை. என்றாலும் இது ஒரு காப்பிகேட் என்று அறிந்து கொண்டதிலிருந்தே விருப்பு இல்லாமல் போயிற்று. மூலத்தை மிஞ்சிய நகல் என்று வேண்டுமெனில் சொல்லிக் கொள்ளலாம். அடுத்தபடத்தை முழுக்க உங்களது கற்பனையில் படையுங்கள் மிஷ்கின்.

அடுத்த ஐந்து என்னவாக இருக்கும்???


Directed : Michel Gondry
Starring  : Jim Carrey, Kate Winslet, Kirsten Dunst, Mark Ruffalo, Elijah Wood
Music : Jon Brion
Language : English
Genre : Romantic Fantasy

பகுதி 1

இன்று ஜோயலுக்கு என்ன நிகழ்ந்ததென்றே தெரியவில்லை. ஆழ்ந்த கனவொன்றில் சிக்கி உயிர்பிழைத்து வந்ததைப் போல இருக்கிறது காலை. சில வருடங்களைத் தாண்டிவிட்டோமா அல்லது இழந்துவிட்டோமா? இந்த இரவு அவனிடமிருந்து பிடுங்கியது என்னவாக இருக்கும்?

ஜோயல் மொண்டாக் செல்லுகிறார் எதுவோ நிகழ்ந்து முடிந்துவிட்ட உணர்வோடு. சிலசமயம் நினைவிழப்பிலிருந்து மீளாதா என்ற குழப்பத்தோடும்.. நிகழ்ந்துவிட்டவைகளை விட நிகழ்பவைகளின் மீதுண்டான கவனத்தின் பாதையிலேயே வாழ்க்கை செல்லுமென்பதை அவர் மறந்துவிடவில்லை.. ஆனால் இவ்வாறான குழப்பங்களுக்கு மத்தியில் ஜோயல் ஏன் இவளை சந்திக்கவேண்டும்?

பெண்களின் கவனம் தன் மீது பட்டவுடனேயே ஜோயலுக்கு ஏன் காதல் கொள்ளத் தோணுகிறது? மொண்டாக் செல்லும் ரயிலில் க்ளமெண்டைன் தன்னை ஜோயலிடம் அறிமுகப்படுத்திக் கொள்ளுகிறாள்........ க்ளமெண்டைன்... என்ன பெயரிது? கேலிக்குரிய பெயர்தான்.எண்ணங்களிலிருந்து எதிர்புறம் செல்லும் ஜோயலும் க்ளமெண்டைனும் காதல் கொள்கிறார்கள். புத்தகசாலை, ஐஸ்கட்டி பாதை, கடற்கரை வீடு என்று காதலர்களின் குறியீட்டு இடங்களைச் சுற்றுகிறார்கள். காதல்.... அது மகத்தான ஒன்று!!!

பகுதி 2

இரண்டு வருடங்களாக ஜோயலும் க்ளமெண்டைனும் காதலிக்கிறார்கள். ஒரு சண்டை காரணமாக க்ளமெண்டைன் ஜோயலைப் பிரிந்து லகுனா எனும் நினைவுகளை அழிக்கும் நிறுவனத்தில் தனக்கும் ஜோயலுக்கும் உண்டான நினைவுகளை அழித்து புதுவாழ்க்கை வாழ்கிறாள். மேலும் அந்த புது வாழ்க்கையில் பேட்ரிக் என்பவரோடு காதலும் புரிகிறார். இதைக் கேள்விப்படும் ஜோயல் இடிந்து போய் ஒருகட்டத்தில் தானும் க்ளமெண்டைனின் நினைவுகளை அழித்துவிடக் கோரி அதே நிறுவனத்தை நாடுகிறார். க்ளமெண்டைனின் நினைவு தூண்டும் எந்த ஒரு விஷயத்தையும் எடுத்து வருமாறு நிறுவனத்தினர் கூறவே, ஜோயல் அவள் சம்பந்தமான எல்லா பொருட்களையும் தூக்கி வருகிறார். அதைக் கொண்டு க்ளமெண்டைன் - ஜோயல் சந்திப்பு நினைவுகளைத் தூண்டி மேப் போடுகிறார்கள். தூக்கத்திலிருக்கும் பொழுது ஆழ்மனது வெளிப்படும் என்பதால் ஜோயலின் வீட்டிலேயே சென்று அவர் தூங்கும் நேரத்தில் கொஞ்சம் கொஞ்சமாக அவள் மீதான நினைவுகளை அழிக்கிறார்கள். இச்சூழ்நிலையில் லகுனா நிறுவனத்தின் டாக்டரைக் காதலித்து பின்னர் நினைவுகளை அழித்துக் கொண்ட மேரிக்கு தன் நினைவுகள் அழிக்கப்பட்ட விஷயம் தெரிந்து லகுனா நிறுவனத்தைச் சூறையாடி அங்கிருந்த பதிவுசெய்யப்பட்ட ஒலிநாடாக்களை சம்பந்தப்பட்ட நினைவுகளை அழித்துக் கொண்ட எல்லாருக்கும் அஞ்சல் அனுப்பிவிடுகிறாள்.

பகுதி 3

மயக்கத்திலிருந்து எழுந்த ஜோயலுக்கு இரவு நடந்தது என்னவென்றே தெரியவில்லை.. எதையோ இழந்துவிட்டதைப் போன்று உணர்ந்த ஜோயல் எப்பொழுதும் போல மொண்டாக் செல்லுகிறார். மொண்டாக் செல்லும் ரயிலில் க்ளெமெண்டைன் எனும் பெண்ணைப் பார்க்கிறார். அவளாகவே தன்னை அறிமுகப்படுத்திக் கொள்கிறாள். இருவரும் நீண்டநாட்கள் பழகியதைப் போன்றும் அவர்களறியாத சொல்ல முடியாத உணர்ச்சியின் தூண்டுதலாலும் காதலிக்கிறார்கள். இருவரும் புத்தம் புதிய காதலர்கள். ஆனால் உண்மையில் அவர்கள் நினைவுகளை அழித்துக் கொண்ட பழைய காதலர்கள்........... இருவரின் கைக்கும் தாங்கள் நினைவுகளை அழித்துக் கொண்ட ரகசியம் அஞ்சலில் வருகிறது......


Eternal Sunshine of the Spotless Mind, ஜிம் கேரி மற்றும் கேய்ட் வின்ஸ்லெட் ஆகியோரின் அற்புதமான நடிப்பில் மைக்கேல் கோண்ட்ரி இயக்கத்தில் 2004 ம் வருடம் வெளிவந்தது. நவீன அறிவியலின் மூலம் உளவியல் கூறுகளை அழிக்கும் பொருட்டு ஏற்படும் நினைவுத் திறனின் உறவு சிதைவு பற்றி அழிபடுபவர் நினைக்கும் நினைவுகளின் மீட்சி வழியே சொல்லப்படும் மிகச்சிறந்த காதல் கதையே இந்த படம். நமது ஆழ்மனத்தைத் தோண்டியெடுத்து அதனோடு நிகழ் மற்றும் நினைவு ஆகியவற்றைப் பொருத்தி விளையாடும் கனவுகள் அல்லது ஆழ்மனதில் புதைந்து கிடக்கும் ரகசியங்களை அதனதன் தோற்றத்தின் வாயிலாகவே சொல்லப்படுகிறது. 

முறையற்ற கதைசொல்லும் முறையில் இயக்கப்பட்டிருக்கும் இக்கதை முழுக்க நினைவுகளின் குறியீடுகள் நிறைந்து கிடக்கின்றன. ஜோயலின் நினைவுகள் எப்படி நிகழ்காலத்தையும் கடந்த காலத்தையும் முடிச்சுப் போடுகின்றன என்பதிலிருந்து தொடங்கி, தன் மனதிற்குரிய க்ளமெண்டைன் தன்னைவிட்டு அழிந்து போகிறாள் என்பதை நினைவுகளின் வாயிலாகவே அறிந்து கொள்ளும் ஜோயலின் உணர்ச்சிகரமான காதலில் உண்மையில் கண்கலங்கியே போய்விடுகிறோம். ஒவ்வொரு முறையும் க்ளமெண்டைனை தன்னுள் நிறுத்திக் கொள்ள ஜோயல் போராடுகிறார். அதற்காக அவர் நினைவுகள் செல்லும் பாதையெங்கும் நம்மையே அழைத்துச் செல்லுகிறார். ஆழ்மனது ஒவ்வொரு புள்ளியாக க்ளமெண்டைனை நினைவுபடுத்திக் கொண்டேயிருக்க, ஜோயல் முடிவாக மறந்தும் போகிறார். சிறிதும் கவனம் சிதறாமல் பார்த்தாலொழிய குறியீட்டுக் காட்சிகளையோ திருப்புமுனைக் காட்சிகளையோ புரிந்து கொள்ளமுடியாது. கதைப் போக்கு முறையற்று வருவதாலும் நிகழ் மற்றும் நினைவுகாலங்களைப் பிரித்து வேறுபடுத்தி காணும் உழைப்பு தேவைப்படுகிறது. பெரும்பாலும் அது எளிமையாகவே இருந்துவிடுகிறது....

படத்தில் எண்ணற்ற குறியீடுகள் காணப்படுகின்றன. குறிப்பாகச் சொல்லவேண்டுமெனில் ஜோயலின் நினைவு அழிவதை காட்சிகளின் மூலமே சொல்லப்படுவது சிறப்பு. ஜோயல் காணும் முகமற்ற மனிதர்கள், மறைந்து போகும் கார், மற்றும் கட்டிடங்கள், இடிந்து விழும் கடற்கரை வீடு, முகம் தெரியாத பேட்ரிக்கின் உருவம், திரும்பிப் பார்க்க இயலாத மனிதன், எழுத்துக்களற்ற புத்தகசாலை, இருபுறமும் செல்லமுடியாமல் ஒரு எல்லையற்ற நிலையில் ஜோயல் உணருவது, என ஒவ்வொரு குறியீடுகளும் ஜோயலின் நினைவுகள் அழிப்பதை மிக அழகாகச் சொல்லுகின்றன.

நாம் சிலசமயம் அரை தூக்கத்தில் இருக்கும்பொழுது வெளியே நடக்கும் பேச்சுக்கள் யாவும் கனவிலும் கேட்கும். இதை பலரும் உணர்ந்திருப்பார்கள். அப்படியான காட்சிகள் ஜோயலுக்கு அடிக்கடி ஏற்படுகிறது. ஜோயலின் நினைவுகளை அழிக்கும் பேட்ரிக் (க்ளமெண்டைனின் காதலனேதான்) மற்றும் ஸ்டானின் உரையாடல்கள் ஜோயலின் நினைவுகள் வழியே க்ளமெண்டைனோடு இணைக்கிறது. ஒவ்வொரு காட்சியின் விளிம்பிலும் க்ளமெண்டைன் மறைவதாகவே இருக்கும்.

படத்தின் இசை பெரும்பாலும் நிசப்தத்தையே வழங்குகிறது. மெல்ல ஆரம்பிக்கும் பியனோ முதல் இசையற்ற ஹம்மிங் பாடல் வரை கதையைச் சிதைத்துவிடாமலேயே இருக்கிறது.

சிறந்த திரைக்கதைக்கான ஆஸ்கர் விருது பெற்ற இப்படம் நான் பார்த்தவற்றில் மிகச் சிறந்த திரைக்கதை உத்தி படங்களில் ஒன்றாகவும், ஒரு உணர்ச்சிகரமான தூண்டுதலை வழங்கி மனதுக்குள் அசைபோடும் மிகச்சிறந்த படங்களில் ஒன்றாகவும் கருதுகிறேன்.

உங்கள் மனதில் உணர்ச்சிமயமான காதல் ஒன்று இருந்தால் நிச்சயம் இப்படத்தைப் பாருங்கள்!!

அன்புடன்
ஆதவா.

16/12/2010

How to Train Your Dragon (2010)

by ஆதவா |

Film : How to Train Your Dragon
Direction : Chris Sanders, Dean DeBlois
Studio: DreamWorks Animation
Year : 2010
Language : English
Genre : Animation

நாம் மனிதர்கள்.. ஆனால் சில விஷயங்களுக்கு அப்பாற்பட்டு நாம் எல்லாருமே விலங்குகள் தான்... பல்வேறு விலங்குகளில் நாமும் ஒரு தனி அங்கம்... மனிதன் எனும் அடையாளமே நமது சிந்திக்கும் அறிவினால் ஏற்பட்டது. ஆனாலும் அதைவிட இன்னொரு காரணமும் உண்டு... அது, அன்பு.

நாம் வளர்க்கும் பிராணிகள் நம்மிடம் பதிலுக்கு எதிர்பார்ப்பது அதன் அன்பு.... நாம் அதனிடம் பாசத்தைக் கொட்டுகிறோம்... ஒருவர் மீது ஒருவர் கொட்டும் பாசத்தால் அதனை நம்மால் விலங்கு என்று சொல்லிவிட முடியாமலும் இருக்கிறது. எனக்குத் தெரிந்து என் சித்தி ஒருவர், தான் வளர்த்த நாய் இறந்து போனதற்காக இரண்டு நாட்கள் உண்ணாமல் அழுதழுது கண்கள் வீங்க, ஆச்சரியமாக நான் பார்த்திருக்கிறேன்... என் மாமா ஆசையாக கோழி வளர்த்து அது ஒரு தெருநாயால் கண்முன்னே சாகடிக்கப்பட்டதைப் பார்த்து ஒரு வாரம் சோகமாக இருந்ததை நேரடியாகப் பார்த்திருக்கிறேன்.. நானே ஒரு கோழி இறந்ததற்கு தொண்டை அடைக்க வருத்தப்பட்டிருக்கிறேன். இதெல்லாம் என்னைச் சார்ந்த உதாரணங்கள்... ஆனால் வாழ்வில் நாம் காணும் விலங்கு + மனிதன் உதாரணங்கள் வியப்பில் ஆழ்த்துபவை!!

எந்த ஒரு விலங்கும் குரோதம் கொண்டிருப்பதில்லை. மனிதனைத் தவிர// அவைகள் தற்காப்புக்காகவோ அல்லது உணவிற்காகவோதான் இன்னொரு விலங்கை வீழ்த்தப்பார்க்கின்றன.... ட்ராகன்களும் அப்படித்தான்...................

சரி உங்களுக்கு ஒரு கதை சொல்லுகிறேன்..

முன்னொரு காலத்தில் அட்லாண்டிக்கில் நுண்ணியப் புள்ளியாக இருக்கும் ஒரு தீவொன்றில் ஹிக்கப் என்றொரு சிறுவன் இருந்தான். அந்த தீவுக்கு அடிக்கடி ட்ராகன்கள் வந்து ஆடுகளைக் கவர்ந்து கொண்டு சென்றுவிடும். அதனைத் தடுக்க அந்த தீவு வாசிகள் எல்லாரும் ட்ராகன்களை எதிர்த்து போராடுவார்கள். ஹிக்கப் ரொம்பவும் சிறுவனல்லவா... அவனுக்கு சண்டை போடத் தெரியாது. இருந்தாலும் தன்னோட திறமை எல்லாருக்கும் தெரியவேண்டும் என்பதற்காக ஒருமுறை ட்ராகன்கள் தீவை சூறையாடிக் கொண்டிருக்கும் போது யாருக்கும் தெரியாமல் ட்ராகன் இனத்திலேயே யாராலும் பார்த்திராத, திறமை வாய்ந்த மிக வேகம் வாய்ந்த நைட் ஃப்யூரி என்ற ட்ராகனை வீழ்த்தி விடுகிறான். ஆனால் பாவம், அப்போது அவனைப் பாராட்ட யாருமில்லாததாலும் அதே நேரத்தில் சிறுவன் இன்னொரு ட்ராகனிடம் மாட்டிக் கொண்டதாலும் சிறுவனின் தந்தை காப்பாற்றி அவனை எச்சரிக்கிறார்.. சிறுவன் தானும் ஒரு ட்ராகனை வீழ்த்திவிட்டேன் என்று சொல்லியும் யாரும் கேட்பதாக இல்லை

போர் முடிந்த மறுநாள் ஹிக்கப் அந்த தீவினுள் நொந்தவாறே வெகுதூரம் செல்கிறான். அப்போதுதான் அவனுக்குத் தெரிகிறது நைட் ஃப்யூரி ட்ராகன் ஒன்று தான் எய்த அம்பினால் மாட்டி பரிதாபமாக விழுந்து கிடக்கிறது என்று... அவனுக்கு ஆச்சரியம், மகிழ்ச்சி.... எப்படியாவது அதனைக் கொன்று தன்னை நிரூபிக்க வேண்டும் என்று துடித்து, கத்தியால் ஓங்கி குத்தப் போக..... அவனுக்கு ஏதோ ஒன்று தடுக்கிறது... குற்றுயிரும் குலையுயிருமாகக் கிடக்கும் இந்த ட்ராகனை கொல்ல அவனுக்கு மனம் வரவில்லை, உடனே அதை விடுவித்து பறக்க விட்டான்... அதுவும் கட்டவிழ்ந்ததும் ஹிக்கப்பை ஒரு முறை முறைத்துவிட்டு ததக்கா பிதக்கா என்று பறந்து பறந்து சென்றது...



இப்போது அந்த தீவினுள் ட்ராகனைக் கொல்வது எப்படி எனும் பயிற்சி அங்குள்ள பயிற்சியாளரால் வழங்கப்படுகிறது. அதில் ஹிக்கப்பும் அவன் வயதை ஒத்த மற்ற சிறார்களும் பங்கு பெறுகிறார்கள். அப்போது பயிற்சியாளர், ட்ராகன்களின் முதல் வேலை மனிதர்களைக் கொல்வதுதான் என்கிறார். அதைக் கேட்ட ஹிக்கப் அப்படியானால் தன்னை ஏன் நைட் ஃப்யூரி கொல்லவில்லை என்று யோசிக்கிறான்... பயிற்சியில் ஒவ்வொரு நாளும் ஒவ்வொரு ட்ராகனை பயிற்சிக்காக சிறையிலிருந்து வெளியேற்றுவார்கள். அதனை வெல்லவேண்டும்... முதல் நாள் ஆஸ்ட்ரிட் எனும் சிறுமி முதன்மை பெறுகிறாள். ஹிக்கப் தோற்றுவிடுகிறான். உடனே நைட் ஃப்யூரியைப் பார்த்த இடத்திற்குப் போய் பார்க்கிறான்.. அங்கே அந்த ட்ராகன் பறக்க முடியாமல் தவித்துக் கொண்டிருப்பதைப் பார்க்கிறான்... அப்போதுதான் அவனுக்குத் தெரிகிறது அந்த ட்ராகனின் வாலில் ஒரு பகுதி வெட்டுபட்டிருப்பது... அந்த ட்ராகனிடம் கொஞ்சம் கொஞ்சமாக சினேகம் கொண்டு அறுந்த வாலைப் போல ஒன்று செய்து வந்து, மாட்டுகிறான்... அப்போது அந்த ட்ராகனால் பறக்க முடிகிறது. இடையிடையே ட்ராகன்களின் நிறை குறை ஆகியவற்றை அறிந்து அதை பயிற்சியில் செயல்படுத்தி அனைத்து பயிற்சிகளிலும் முதல் ஆளாக வருகிறான். இதனைக் கண்டு பொறாமை கொள்ளும் ஆஸ்ட்ரிட் இவனுக்கும் நைட் ஃப்யூரிக்கும் உள்ள சினேகத்தை அறிந்து கொள்வதோடு, ட்ராகன்களின் கோட்டையையும் ட்ராகன்கள் எதற்காக ஆடுகளைக் கவர தீவுகளுக்கு வருகின்றன என்ற ரகசியத்தையும் அறிந்து கொள்கிறாள். அதனோடு, ட்ராகன் கோட்டையில் இருக்கும் மிகப்பெரும் ட்ராகனால்தான் மற்ற ட்ராகன்கள் அடிமை வேலையாக அதற்கு உணவு கொண்டுவரும் பொருட்டு தீவுகளைச் சூறையாடுகின்றன என்பதையும் இருவரும் தெரிந்து கொள்கிறார்கள்

இறுதி பயிற்சியில் வைகிங் எனும் நிலையை அடைய ஹிக்கப் அடைத்து வைக்கப்பட்ட ட்ராகனோடு சண்டையிடும் பொழுது, அனைவருக்கும் கேட்கும்படி, ட்ராகன்கள் நாம் நினைப்பது போல அல்ல ; அவைகளைப் புரிந்து கொள்ளவேண்டும் என்று ஆயுதத்தைக் கீழே போட்டுவிடுகிறான். இருப்பினும் சண்டைக்கு நின்ற ட்ராகன் அவனைக் கொல்ல வருகிறது... அதாவது அவன் தன்னை துன்புறுத்துவிடுவானோ என்று அஞ்சி கொல்ல வருகிறது. இந்த அமளிதுமளியை எங்கிருந்தோ கேட்கும் நைட்ஃப்யூரி தனது அறுந்த வாலோடு எப்படியோ முயற்சித்து பறந்து வந்து ஹிக்கப்பை காப்பாற்ற முயற்சி செய்கையில் மனிதர்களின் கைக்கு மாட்டிவிடுகிறது. இதுவரையிலும் நைட்ஃப்யூரியைக் கண்டிராத மக்கள் அதனை சிறையில் அடைப்பதோடு மட்டுமில்லாமல் ட்ராகன்களின் கோட்டைக்குச் செல்லும் வழி நைட்ஃப்யூரியை வைத்து அறிந்து அங்கே அதனை அழைத்துச் சென்று ட்ராகன்களோடு போரிட தயாராகுகிறார்கள்.

அந்த போரில் வென்றார்களா?
ஹிக்கப் மற்றும் ஆஸ்ட்ரிட் ஆகியோர் கதியென்ன?
நைட்ஃப்யூரி என்னவாயிற்று?
பெரிய ட்ராகன் கொல்லப்பட்டதா?

போன்ற விபரங்களை How to Train Your Dragon படத்தின் க்ளைமாக்ஸில் ஆனந்தமாகக் கண்டுகளிக்கலாம்!!

பிரிட்டிஷ் எழுத்தாளரான Cressida Cowell எழுதிய சிறுவர் இலக்கியமான How to Train Your Dragon எனும் கதையைத் தழுவியே இப்படம் உருவாக்கப்பட்டிருக்கிறது. இவரது கதைகளில் முதல் கதையும் இதுவே, இதுவரை பத்து கதைகள் எழுதியிருக்கிறார்.. பத்தும் திரைப்படம் ஆகும் என்பதற்கு இதன் அடுத்தபாகத்திற்கான வேலைகளே சான்று. படம் 3D யில் வந்திருக்கிறது. எனக்கு அதனை 3Dயில் காணும் வாய்ப்பு கிடைக்கவில்லை. படம் முழுக்க ஒரு சீரியஸ்னஸ் குறைந்து காணப்படுகிறது. Pixar ன் படங்களில் இருக்கும் உணர்வெழுச்சி இதில் மிகவும் குறைந்திருப்பது ஒரு மிகப்பெரிய குறை. பிக்ஸரின் UP படத்தில் வரும் கிழவர் சோகமாக இருந்தால் நாமும் சோகமாகிவிடுவோம். சிரித்தால் நாமும் சந்தோஷப்படுவோம்... Wall-E காதலித்தால் நாமும் காதல்வயப்படுவோம்... ஆனால் ஹிக்கப்பின் வீரம் நமக்கு சிலிர்க்கவில்லை என்பதே உண்மை.

:Trailor:

http://www.youtube.com/watch?v=qHUhygdAZIw

14/12/2010

The Shawshank Redemption (1994)

by ஆதவா |


Film : The Shawshank Redemption
Direction : Frank Darabont
Starring : Tim Robbins, Morgan Freeman
Year : 1994
Language : English
Genre : Drama

வாழ்க்கை என்பது என்ன? வெறும் கற்றுக் கொண்டிருப்பது மட்டும்தானா? அல்லது கற்றதை வெறுமனே செய்வது மட்டும்தானா? ஒரு institutional வாழ்க்கை வாழ்வதற்கா அறிவு ஒன்று மற்ற பிராணிகளைக் காட்டிலும் அதிகமாக இருக்கிறது?? கனவுகள்!! நாம் இன்னவாக ஆவோம் என்ற கனவுகள் அல்ல.. நாம் இன்னவாக இருப்போம் என்ற கனவுகள்... கனவுகளே பிரதேசங்களாக இருக்கும் இடத்தில் கனவுகள் ஒரு ஆச்சரியமல்ல.. ஆனால் கனவுகள் உலர்ந்து போன அல்லது மறுக்கப்பட்ட உலகத்தில் தன்னம்பிக்கையும் புத்திச்சாலித்தனமுமே கனவுகள். ஷாஷாங் ரிடெம்ப்ஷன் இதைத்தான் படம் முழுக்கச் சொல்லிக் கொண்டிருக்கிறது. 

போர்ட்லேண்ட் வங்கியின் துணை அதிபர் Andy Dufresne ஒரு மூடிவைத்த புத்தகம் போன்ற குணமுடையவராக இருப்பதாக அவன் மனைவி அவனிடம் சொல்வதுண்டு. ஒரு மோசமான கணவனாக எண்ணி அவனிடமிருந்து தன்னை விலகிவிட நினைத்தாள். ஆனால் ஆண்டி அப்படியல்ல... அவளை மிகவும் நேசித்தான்.. ஒரு சமயம் தன் மனைவியும் இன்னொரு கோல்ப் விளையாட்டு வீரனும் ஒன்றாக காதலித்து ஒன்றாகப் புணரும் காட்சியைக் கண்ட ஆண்டிக்கு இருவரையும் சுட்டு வீழ்த்தவேண்டும் என்று தோணுகிறது. கையில் பிஸ்டலும் மதுவுமாக இணைந்து அவரை கோர விளையாட்டிற்கு அழைக்கிறது.... ஆனால் ஆண்டி டூஃப்ரேன் தனது சுயநினைவிலிருந்து வெகு தூரம் விலகிப் போயிருந்தார். மதுவின் மயக்கமும் மனைவியின் மீதான வெறியும் கொலைத் தூண்டுதலும்......... இறுதியில் மனைவியும் கள்ளக்காதலனும் ஒருவர் கரத்தில் ஒருவராக இறந்துபோய்விடுகிறார்கள். இது நடப்பது 1947 ம் வருடம்...

டுஃப்ரேன் இரட்டை ஆயுள் தண்டணை பெற்று ஷாஷாங் சிறைச்சாலைக்கு வருகிறார். அங்கே ஏற்கனவே 20 வருடங்கள் சிறையில் கழித்துவிட்ட ரெட், பரோல் விசாரணையில் வழக்கம் போல நிராகரிக்கப்பட்டு புதிய கைதிகளின் வருகைக்காக பார்வையிடுகிறார். ஆண்டி, அவரது முதல் இம்ப்ரெஷன்.... இருவரும் பழகுகிறார்கள் ஒன்றோடு ஒன்றாக...... சிறைச்சாலை என்பது கெட்டவர்கள் மட்டுமே உள்ள இடமா? ரெட் சொல்கிறார்... இங்கே யாவரும் குற்றமற்றவர்கள்தான்.... பார்க்கப் போனால் சிறைச்சாலை என்பது வாழ்க்கையைப் பிடுங்கும் இடம். வாழ்க்கை என்பதை இன்னொருவரின் கட்டுக்குள் வந்து நிர்மாணிக்கும் இடம். உங்களது வாழ்க்கையை இன்னொருவர் அனுபவித்துக் கொண்டிருப்பார்.... அல்லது பிடுங்கியெறிந்து கொண்டிருப்பார்...
ம்ம்... நான் இரண்டு பேரை அறிமுகப்படுத்தவேண்டும் முதலாவது ஷாஷாங் சிறைச்சாலை அதிகாரிகளின் கேப்டன் ஹாட்லீ, இரண்டாவது சிறைச்சாலை வார்டன் நார்டன்.

மிக முக்கியமாக கதையைக் கூறிக் கொண்டிருக்கும் ரெட்...

வெளியே இருந்து எந்த பொருளையும் சிறைக்குள் கொண்டு வந்து விற்கும் திறமையுடைய ரெட்டிடம், தனது வாழ்நாளில் உறுப்படியாக ஏதாவது ஒன்றை கல்லில் செதுக்குவதற்கு சிறிய சுத்தியல் வேண்டும் என்று டுஃப்ரேன் கேட்கிறார். ரெட் ஏற்பாடு செய்து தருகிறார். அது மட்டுமல்ல... 20 சதம் கமிஷன் வைத்து எந்த பொருளென்றாலும் ரெட்டினால் ஏற்பாடு செய்துதர இயலும்... 1950 களில் கவர்ச்சிக் கன்னியாக இருந்த Rita Hayworth இன் புகைப்படம் கூட ரெட்டினால் கொண்டு வர இயலும்.... எல்லாவற்றிலும் கமிஷன்... காற்று கூட உள்ளே நுழையமுடியாத மிகப்பெரும், கடும் காவல் உள்ள அந்த சிறைச்சாலையில் பணம் மட்டும் எளிதாக நுழைந்துவிடுகிறது.... பணம் பாதாளமும் செல்லும்.!!!

1949 ல் அந்த சிறைச்சாலை மேற்கூரையில் தார் பூசுவதற்கு ஒரு டஜன் ஆட்களைத் தேர்ந்தெடுக்கிறார்கள்... உள்ளே வேலை செய்வதற்குப் பதில் வெளியே செய்வது கைதிகளுக்கு பேரின்பமாகவே இருக்கும்... ரெட் “கவனித்ததால்” அவனது சகாக்கள் மேற்கூரையில் வேலை செய்ய பணிக்கப்படுகிறார்கள். கேப்டன் ஹாட்லியின் சொத்து வரி ஏய்ப்பு குறித்து பேசும் ஆண்டிக்கு அதுதான் சிறைச்சாலையில் மிக முக்கிய நாளாக இருந்திருக்கும். ஒரு பேங்கராக இருக்கும் ஆண்டி, ஷாஷாங்கின் எல்லா அதிகாரிகளுக்கும் ஏன் வார்டன் உட்பட எதிர்கொள்ளும் எல்லா ஆண்டுகளுக்கும் வருமான வரி ஏய்ப்பு , விண்ணப்ப பூர்த்தி, சட்ட உதவி, ஆகியவற்றை இலவசமாக செய்து தருகிறார்..... இலவசம் என்ற சொல் தகாது.... ஏனெனில் வாழ்க்கையைப் பிடுங்கும் சிறைச்சாலையில் வருமானம் எதிர்பார்ப்பது முட்டாள்தனமானது!!

ஒவ்வொருவரும் ஒவ்வொருவகையில் சிறைச்சாலை நாட்களைக் கழிப்பார்கள்... ஆண்டி, நூலகத்தை விரிவாக்குகிறார். அதற்காக உதவியும் பெறுகிறார். தனது அறையில் பொருட்கள் வைத்துக் கொள்வதையும் போஸ்டர் ஒட்டிக் கொள்வதையும் வார்டனின் அனுமதியைப் பெற்றுக் கொள்கிறார்.... வருடங்கள் வேகமாக விரைகின்றன... இப்பொழுது மர்லின் மன்றோ ஆண்டியின் அறையை நிரப்பினாள். ஒரு சமயத்தில் வார்டன் செய்யும் எல்லா சட்டவிரோதமான சம்பாதனைக்குப் பின்னும் ஆண்டியின் உழைப்பு இருக்கிறது.. குறைந்த ஊழியத்திற்கு வேலை வாங்கி, காண்ட்ராக்டர்களிடம் பெறும் லஞ்சத்தை Randel Stephens எனும் பெயரில் போலி நபரை உருவாக்கி, போலியான விபரங்கள், லைசன்ஸ், முகவரி, ஐடி ஆகியவற்றை உருவாக்கி கையெழுத்தும் இட்டு, வார்டனுக்காக செய்து தருகிறார்.... ஒருவேளை சட்டவிரோதமான செயலுக்கு பொறுப்பாக வேண்டுமென்றால் ராண்டல் என்ற ஒரு போலியான நபரையே சட்டம் பிடித்துக் கொள்ளும்படியான பாதுகாப்பு வார்டனுக்குக் கிடைக்கிறது...

1965 ம் வருடம் Raquel Welch எனும் நடிகை, ஆண்டியின் அறையில் பெரிதாக ஒட்டப்பட்டிருந்த மர்லின் மன்றோவை அகற்றியிருந்தாள். அச்சமயம் வந்த புதுவரவு கைதிகளில் Tommy Williams எனும் இளைஞன் ஆண்டி மற்றும் ரெட் குழுவினரிடம் பழகுகிறான்.. அவன் வாயிலாக ஆண்டிக்கு ஒரு உண்மை தெரியவருகிறது... அது ஆண்டி தன் மனைவியைக் கொல்லவில்லை என்பதே!! உடனே வார்டனிடம் இதைப் பற்றிச் சொல்லும் ஆண்டி, வெளியே சென்றால் வார்டனை இம்மியளவும் காட்டிக் கொடுக்கமாட்டேன் என்றும் சொல்கிறார். வார்டனுக்கு ஆண்டியை விட மனதில்லை... இப்பொழுது ஆண்டி வார்டனுக்கு பணம் கொட்டும் அடிமை.... அவரது சூத்திரத்தனத்தால் டாமி கொல்லப்படுகிறான். ஆண்டி வேறு வழியில்லாமல் தொடந்து வேலை செய்கிறான் வார்டனுக்காக.....

அந்த இரவு வரையிலும்தான் இவையெல்லாம்.................
ரெட் சொல்லுவார்... ஒரு ப்ரேக்பாயிண்ட் எல்லாருக்கும் வரும்...... ஆண்டிக்கு அப்படியொரு ப்ரேக் பாயிண்ட்,.. 1966ம் வருடம் ஓரிரவு ஆண்டி, தனது சிறை அறையில் மாயமாக மறைந்து போகிறார்...........அவர் எப்படி சென்றிருப்பார் என்று ரெட் சொல்லுகிறார்..... ஆண்டி ஒரு தன்னம்பிக்கையான மனிதன்.... அவனது கனவு Zihuantanejo எனும் பசிபிக் கடற்கரையோரம் ஹோட்டல் கட்டி வாழுவது..... இருபது வருடங்கள் தேக்கி வைத்திருந்த கனவு இனி நிறைவேறும்....

1994 ல் Stephen King ன் Rita Hayworth and Shawshank Redemption எனும் நாவலைத் தழுவி ஃப்ராண்ட் டாராபாண்ட் இயக்கிய இப்படம் முடியும் தருவாயில் நாம் நாமாகவே இருக்க முடிவதில்லை... நம்மை எப்படியாவது இழுத்து, ஆண்டி மற்றும் ரெட் போன்ற சக கைதிகளுக்குள் நுழைத்துவிடுகிறது.... ஷாஷாங் என்பது உண்மையில் மனிதர்கள் தங்களுக்குள் ஏற்படுத்திக் கொண்ட சிறை அதிலிருந்து வெளியேறி விடுதலை பெறும் மனதினைப் பற்றியே படம் குறிப்புணர்த்திக் கூறுகிறது. ஆண்டி மற்றும் நார்டன் ஆகிய இருவரும் நம் மனதின் நேர் மற்றும் எதிர் மின்னூக்க மனதினர்களாக இருக்கின்றனர். ரெட் ஒரு ந்யூட்ரலாக இருக்கிறார்.

படத்தில் மிக முக்கியமாக ஷாஷாங் சிறைச்சாலை லைப்ரரியனாக வரும் ப்ரூக்ஸின் காட்சிகள் ஒருசில நிமிட சோகக் கவிதை.. ஐம்பது வருட சிறை தண்டனை முடிந்து பரோலில் வெளிவரும் ப்ரூக்ஸ் (Brooks) தன் சிறுவயதில் ஒரு வாகனம் ஒன்றை பார்த்திருக்கிறார்.... ஆனால் உலகம் மாறிக் கொண்டேயிருக்கிறது. அது அவசரமாக இரவையும் பகலையும் முடித்துக் கொள்ள நினைக்கிறது.. இப்பொழுது வாகனங்கள் எல்லா இடங்களிலும் இருக்கின்றன...... எல்லாரும் ஏதாவது ஒரு பணியில் தங்களை இடம்மாற்றிக் கொண்டேயிருக்கிறார்கள்.... ஒரு சிறைச்சாலை லைப்ரரியனாகவே ஐம்பது வருடத்தை நன்கு உறிஞ்சிய பிறகு அந்த முதியவரால் என்ன செய்ய இயலும்?
தொங்குவதைவிட!???

40 வருடங்கள் கழித்து பரோலில் வெளி வரும் ரெட்டுக்கு அப்படியொரு சூழ்நிலை ஏற்படுவதில்லை... ஆண்டியின் நட்பு, ரெட்டுக்கு இரண்டாம் வாழ்க்கையைத் தருகிறது....

படம் முழுக்கப் பேசப்படும் வசனங்கள் எனக்கு சற்றே கடினமானதாக இருந்தது. அதேசமயம் நன்கு கூர்மையாகவும் ஒருசில இடங்களில் அறைவது போலவும் இருக்கும். Andy Dufresne ஆக வரும் Tim Robbins னின் நடிப்பு எந்த கதாப்பாத்திரத்தோடும் ஒப்பிடாமல் தனித்துவமாகவே பார்க்கத்துவங்கியபோது, அவரது பாத்திரத்திற்கான வலு கொஞ்சம் அதிகரித்ததாகவே தெரிகிறது... உடன் ரெட் ஆக வரும் மார்கன் ஃபிரிமன். என்ன ஆளுய்யா இந்தாளு என்று பிரமிக்கச் செய்கிறார். தேர்ந்த நடிப்பு அவருக்கு... இருவரும் படத்தை நமக்கே கொடுத்துவிடுகிறார்கள். முழுக்க முழுக்க சிறைச்சாலையிலேயே செல்லும் கதை, அதன் சூழ்நிலை, வாழ்வாதாரம் பிடுங்கப்படல், சுயநலம், அடிமை நிலை ஆகியவற்றைக் குறித்து பேசுகிறது. வசூலில் சோபிக்கவில்லை என்றாலும் அமெரிக்க தொலைக்காட்சிகளில் அதிகமுறை ஒளிபரப்பப்பட்ட படம் இதுவாகவே இருக்கும்.

The Shawshank Redemption.... நீங்கள் திரைப்பட விரும்பியாக இருந்தால் ஒருமுறையேனும் பார்த்துவிடுங்கள்.. இதுவரை வெளி வந்த சிறந்த நூறு படங்களில் இதுவும் ஒன்று... மறுப்பதற்கில்லை. ஆனால் விருதுகள் எதுவும் தாங்கவில்லை என்பது காந்திக்கு நோபல் தராதது போல இருக்கிறது!!

அன்புடன்
ஆதவா.

படம் பார்த்தவர்கள் சில தகவல்களைத் தெரிந்து கொள்ள இங்கே செல்லவும்..






நண்பர்களே... நலமா? வெகுநாட்களாக திரைப்படங்களுக்கென தனியே தளம் துவங்கவேண்டும் என்று ஆவல் இருந்து வந்தது. ஏற்கனவே நிறைய நண்பர்கள் திரைப்பட விமர்சன தளங்களை நடத்திவருகையில் நானும் அநாவசியமாகத் துவங்கவேண்டுமோ என்று யோசித்துக் கொண்டேயிருந்தேன். பார்வைகள் ஒவ்வொருவருக்கும் வேறுபட்டது. எனக்கு நேர்மறையான விஷயம் மற்றொருவருக்கு எதிர்மறையாகத் தெரியலாம். கோணங்கள் மாறுபடலாம். கருத்து வேறுபாடுகளும் அவ்வாறே. ஆகவேதான் துணிந்து இறங்கி தளத்தைத் தொடங்கியும் இருக்கிறேன்.
சினிமா என்பது வெகு பலருக்கு தத்தம் கனவுகளின் திரைத் தோற்றமாகவே இருக்கிறது. ஆனால் அதை எத்தனை பேர் கலையாக ஒரு கவிதையாக உணர்கிறார்கள் என்பது தெரியாது. என்னைப் பொருத்தவரையில் எனக்குத் திருப்தியான மனதினுள் கவிதைகளைப் பரப்பிய படங்களையே நான் விமர்சிக்கப்போகிறேன். வித்தியாசமாகவோ அல்லது சப்பையாகவோ இருந்தாலும் நீங்கள் ஏற்று படித்து ஆதரவு தருவீர்கள் என்ற நம்பிக்கையுடன்


ஆதவா.!!

Related Posts Plugin for WordPress, Blogger...
Subscribe